{"id":3407,"date":"2023-04-18T18:21:51","date_gmt":"2023-04-18T18:21:51","guid":{"rendered":"https:\/\/muhamedsytari.net\/?p=3407"},"modified":"2023-04-18T18:27:46","modified_gmt":"2023-04-18T18:27:46","slug":"eshte-ramazan-eshte-ndryshe-eshte-nate-kadri","status":"publish","type":"post","link":"https:\/\/muhamedsytari.net\/?p=3407","title":{"rendered":"\u00cbsht\u00eb Ramazan, \u00ebsht\u00eb ndryshe, \u00ebsht\u00eb Nat\u00eb Kadri!"},"content":{"rendered":"

\u00cbsht\u00eb Ramazan, \u00ebsht\u00eb ndryshe, \u00ebsht\u00eb Nat\u00eb Kadri!<\/strong><\/p>\n

Nuk ka si mexhliset e Ramazanit! Na bashkon nj\u00eb frym\u00eb, q\u00eb na lart\u00ebson n\u00eb pozitat e rim\u00ebk\u00ebmbjes, duke par\u00eb veten n\u00eb pasqyrat e historis\u00eb, trash\u00ebgimis\u00eb dhe krenaris\u00eb legjitime!<\/p>\n

Mbr\u00ebm\u00eb, xhamia e fshatit Bardhaj ishte e mbushur me drit\u00eb e g\u00ebzim. Pas iftarit t\u00eb madh, q\u00eb imami me k\u00ebshillin e xhamis\u00eb kishin organizuar, ku t\u00eb gjith\u00eb ishin angazhuar nga pak, p\u00ebr ta kthyer at\u00eb mbr\u00ebmje n\u00eb nj\u00eb nat\u00eb, si ato t\u00eb g\u00ebzimeve t\u00eb m\u00ebdha familjare, tash ishte koha e namazit t\u00eb jacis\u00eb, teravis\u00eb dhe lutjeve t\u00eb Nat\u00ebs s\u00eb Kadrit.<\/p>\n

\u00cbsht\u00eb e fort\u00eb si ndjesi, ajo q\u00eb p\u00ebrshfaqet n\u00eb horizontet e k\u00ebsaj vizite, q\u00eb p\u00ebrtej ur\u00ebs s\u00eb fshatit, shfaq hiret e veta me minaren e bardh\u00eb, t\u00eb zbukuruar me drit\u00eb e z\u00e2, q\u00eb p\u00ebrhap gjithandej lutje e bekime kur’anore, si mantel paqeje e m\u00ebshir\u00eb mbi krejt fshatin… Pastaj afrohesh dhe, pamja e par\u00eb q\u00eb t\u00eb z\u00ebn\u00eb syt\u00eb jan\u00eb t\u00eb rinjt\u00eb dhe f\u00ebmij\u00ebt, q\u00eb i paraprijn\u00eb gjysh\u00ebrve dhe baballar\u00ebve p\u00ebr t\u00eb ardhur n\u00eb xhami…<\/p>\n

N\u00eb fakt, n\u00eb momentin q\u00eb f\u00ebmij\u00ebt dhe rinia paraprijn\u00eb drejt xhamis\u00eb, \u00ebsht\u00eb shenj\u00eb zgjimi, \u00ebsht\u00eb d\u00ebshmi rim\u00ebk\u00ebmbjeje, \u00ebsht\u00eb prekje e holl\u00eb e rip\u00ebrt\u00ebritjes s\u00eb amanetit t\u00eb atyre q\u00eb kaluan dhe brezave q\u00eb shkuan, prej atyre q\u00eb e p\u00ebrqafuan me zem\u00ebr e shpirt k\u00ebt\u00eb f\u00e9 t\u00eb past\u00ebr islame dhe udh\u00ebzimin e Zotit n\u00eb jet\u00eb!<\/p>\n

Fytyra t\u00eb qeshura. Z\u00ebra f\u00ebmij\u00ebsh n\u00eb g\u00ebzim. T\u00eb rinj q\u00eb kan\u00eb bisedat e mosh\u00ebs. Pak m\u00eb tutje, Haxhi Ahmeti, plaku i mir\u00eb, q\u00eb p\u00ebrve\u00e7 zemr\u00ebs s\u00eb madhe q\u00eb ka, di t\u00eb t\u00eb fal\u00eb lutje e bekime, si d\u00ebshmi e shpirtit t\u00eb madh t\u00eb krejt k\u00ebsaj zone besimtare! Aty-k\u00ebtu, d\u00ebgjohen z\u00ebrat e n\u00ebnave dhe vajzave t\u00eb xhamis\u00eb, past\u00ebrtoret q\u00eb kujdesen p\u00ebr Sht\u00ebpin\u00eb e Allahut, q\u00eb t\u00eb shndrisi e t\u00eb vezulloj\u00eb nga past\u00ebrtia dhe rendi. Hyn me bismilah dhe e shijon \u00e7do selam me krejt t\u00eb pranishmit buzagaz!<\/p>\n

\u00cbsht\u00eb Ramazan. \u00cbsht\u00eb Nat\u00eb Kadri. \u00cbsht\u00eb mund\u00ebsi e re, nat\u00eb e re, me t\u00eb cil\u00ebn nis nj\u00eb dit\u00eb e re, rrethuar me bekime e m\u00ebshir\u00eb, selame melek\u00ebsh, q\u00eb turma-turma zbresin nga lart\u00ebsit\u00eb qiellore p\u00ebr t\u00eb takuar besimtar\u00ebt, q\u00eb horizonteve v\u00ebrshojn\u00eb p\u00ebr t\u00eb mbushur shpirtin n\u00eb sht\u00ebpit\u00eb e Zotit, ku ka vend p\u00ebr t\u00eb gjith\u00eb…<\/p>\n

Nj\u00eb fije e holl\u00eb e ndan euforin\u00eb, shfaqjet emocionale dhe p\u00ebrshkrimet poetikisht korrekte, nga vullneti real p\u00ebr t\u00eb nd\u00ebrruar stilin e t\u00eb menduarit, at\u00eb t\u00eb lexuarit, t\u00eb vepruarit dhe t\u00eb sjellurit sipas frym\u00ebs s\u00eb v\u00ebrtet\u00eb t\u00eb k\u00ebtij Muaji!<\/p>\n

\u00cbsht\u00eb Ramazan. \u00cbsht\u00eb ndryshe. Realisht, \u00ebsht\u00eb ndryshe! Me lutje e p\u00ebrgj\u00ebrime, namaze e adhurime, ilahi e kujtime, k\u00ebshilla e k\u00ebmbim bisedash t\u00eb denja p\u00ebr mexhlise Ramazani, kjo Nat\u00eb mbeti d\u00ebshmi Nate Kadri…<\/p>\n

Bashk\u00eb me imamin e xhamis\u00eb; hoxh\u00ebn, mjekun, infermierin, v\u00ebllan\u00eb e madh, kujdestarin e t\u00eb kudogjendurin n\u00eb g\u00ebzimet dhe hidh\u00ebrimet e fahatit, me Senadin, shoq\u00ebruesin besnik, me Hakimin, q\u00eb m\u00eb ndjek n\u00eb heshtje dhe \u00ebsht\u00eb i v\u00ebmendsh\u00ebm p\u00ebr \u00e7do detaj, me Jasinin, q\u00eb e ka nj\u00eb hise loje edhe n\u00eb pushimin nd\u00ebrmjet teravis\u00eb dhe namazit t\u00eb tesbih\u00ebve, si dhe t\u00eb rinjt\u00eb e djemt\u00eb e xhamis\u00eb, dalim t\u00eb mbushur, pas ca or\u00ebsh t\u00eb kaluara n\u00eb kijamin e Nat\u00ebs s\u00eb Kadrit, me besim e shpres\u00eb!<\/p>\n

\u00cbsht\u00eb Nat\u00eb, d\u00ebshmi Nate Kadri..!<\/p>\n

Imam Muhamed B. Sytari<\/strong>
\nShkod\u00ebr, m\u00eb 18 prill 2023<\/em><\/p>\n