Një djalë i ri, pyeti një plak të urtë, i tha: Brenda meje janë dy ujqër, që luftojnë me njëri-tjetrin. Njëri më fton për mirë, tjetri për keq…
I urti, ia ktheu: “Do triumfojë ai që do të ushqesh!”
Në jetën e përditshme, ka momente pa fund, kur njeriu provokohet në shenjtëritë e tij, në interesat e tij, në fenë e tij, në perspektivën e fëmijëve, familjes, biznesit, shoqërisë etj.
Në hadith përmendet, se: “Nuk është i fortë mundësi (në dyluftim), i fortë është ai që zotëron veten kur zemërohet!”.
Realitetet e sotme janë të tejngarkuara nga provokimet e njerëzve që vuajnë komplekse fetare, intelektuale, politike, sociale etj. I shohim, i prekim, i dëshmojmë çdo ditë në realitetet tona shqiptare, por jo vetëm. Dëshmohen përherë e më shumë në realitetet evropiane, sidomos në raportet e përballjes bashkëkohore të shoqërive të atjeshme me emigrantët muslimanë, me përqindjen në rritje të konvertimeve cilësore dhe masive të individëve dhe shoqërive perëndimore në Islam…
Ne, si muslimanë jemi të ftuar drejt mbrojtjes së karakterit dhe dinjitetit tonë, përballë provokimeve mesjetare të realiteteve të sotme dhe atyre përreth nesh! Këto i ngjajnë reve të hirta kalimtare, që teksa shfaqen në horizontet tona, përpiqen të mbjellin në brendësitë e humanëve, frikën e shuarjes së diellit…
“Ata që nuk besuan, shpenzojnë pasurinë e tyre për të penguar nga rruga e All-llahut. Ata do ta shpenzojnë atë dhe ajo do të kthehet në dëshpërim për ta, pastaj do të mposhten…” – (El-Enfalë: 36)
Karshi këtyre realiteteve, po ata që besuan, a shpenzojnë sa duhet në rrugën e All-llahut, duke përhapur e mbjellur kudo Islamin, pastërtinë e besimit, dijen e përparimin, ruajtjen e modestinë, krenarinë dhe dinjitetin që sfidon çdo sprovë e provokim injorant?
Sepse, në fund të fundit, do të triumfojë “ai që do ushqesh!”…
Imam Muhamed B. Sytari
Shkodër, më 25 tetor 2016