“Megjithë zhvillimin dhe përparimin e teknologjisë dhe konkurencën e popujve në civilizim e qytetërim, akoma gjejmë klerikë të feve të ndryshme, që ua obligojnë njerëzve të pavërtetat, mitet dhe çfarë mendja se pranon!
Këta, realisht janë opiumi i popujve, njëkohë që feja qëndron lart, shumë më lart, sepse mbi të gjitha i flet mendjes, të cilën e fton drejt punës, përgatitjes dhe zhvillimit…
Kur feja të jetë në duar të sigurta dhe të sinqerta, do të shohim sesi njerëzit do të afrohen drejt saj, turma-turma, grupe-grupe…
Presim elitat, ai grup njerëzish që kërkon dialogun e hapur. Por, a e pranojnë klerikët këtë!?”
Fjalët e mësipërme, janë pjesë e një mesazhi të hollë, të shpërndarë ditën e sotme nga Dr. Salahuddin A. Keftaro. Është një thirrje elitare për njerëzit e fesë, (a të përzierit në punët e saj), për t’u çliruar nga mitologjia fetare, mendimet e mbyllura e sektarizuese, interpretimet e papranueshme, leximet e gabuara, instrumentalizimin e fesë për interesa të ngushta personale, partiake, xhematesh, shoqatash, lidhjesh etj.
Feja, në tërësinë e saj është thirrja e Zotit drejtuar njeriut, jo kapriçoja njerëzore e njerëzve të pandershëm me Zotin e robin, që duke e keqpërdorur fenë e Tij, e largojnë Zotin nga jeta e njerëzve.
A është koha që të çlirohet mendja nga frikërat dhe komplekset e miteve qesharake dhe të pavërtetat që shiten si shenjtëri, në duar djajsh të veshur me petkun e fesë?
A është koha që rrugët e dialogut të hapur dhe leximeve të drejta, të demaskojnë injorancën, abuzimin dhe zhvatjen e intelektit, zemrës, shpirtit e përtej tyre, me maskën e fesë, në fytyra shejtanësh tinzarë?
A është koha që njeriu të kthehet fuqishëm nga Zoti Një, ta kërkojë me zemër atë, ta lexojë dashninë e Tij, kudo në natyrë dhe në veten e tij, t’i lutet pa ndërmjetësinë e askujt dhe të trokasë në dyert e mëshirës së Tij, pa paterica..?
Imam Muhamed B. Sytari
Myfti i Zonës Shkodër
Shkodër, më 30 tetor 2016