Një këshillë e urtë në një kohë sprovash…

Koha e jonë është koha e sprovave. Është momenti, kur nga të gjitha anët fryen veri. I acartë madje, shumë i pabesë, idhnak e dinak!..

Natyrshëm, në kësi rastesh, më shumë se kurrë lypset kurajo e krenari për të mbajtur kokën lart, plot dinjitet, besim e bindje, se këto realitete, si shumë e shumë të tjera në historinë tonë shekullore, do të mbeten pjesë e rëndomtë e një historie të paqytetëruar e meskine.., tamam-tamam, si shkumë deti, përzier me lym, që vetëm se ia trazon përkohësisht transparencën ujit, që asgjë s’e ndot dot.., as lymi e llumi, as shkuma e tallazet…

E, teksa lexoj e veçohem me të urtët dhe trashëgiminë e tyre, më del para sysh Hoxha i zemrës, i urti e largpamësi, i sprovuari si askush, durimtari dhe trashëgimtari i urtisë së shkuar, Shejkh Ahmed Keftaro, rahmet pastë.

Ka një këshillë, tamam për kohën tonë, tamam për ne. Ai këshillon të emigrojmë! Po, po, të emigrojmë e të largohemi..!

Ja si shprehet: “I dërguari i All-llahut (a.s) emigroi nga Mekka në Medine. Po ti, ku e ke hixhretin tënd? Emigrimi nuk është thjeshtë largim nga një vend i caktuar! Emigro drejt All-llahut dhe të dërguarit të Tij, hixhret zemre, hixhret shpirti, hixhret ndjesishë, hixhret dashnie dhe udhëzimi, jo hixhret vendi!

Hixhreti yt është të emigrosh me zemrën tënde drejt All-llahut… të emigrosh me veprat e tua drejt asaj që i pëlqen All-llahut… të emigrosh me edukatën drejt mirësjelljes që do All-llahu…

Në këtë emigrim të kesh shok rruge sinqeritetin tënd me All-llahun, shoqërinë e mirë, të pastër e të përzgjedhur..!”

Rahmet pastë, Hoxha…

Imam Muhamed B. Sytari
Shkodër, më 7 shkurt 2017