Në momente të caktuara, kur duket se sprovat të kanë rrethuar, shëndeti ka diçka që nuk shkon, njerëzit kanë ndryshuar, jetesa është shtrënguar, dyert mezi hapen, busullat e shoqërisë janë vjetruar e vetë kanë nevojë për busull udhëzimi, dita e nata kalojnë shpejt e ti nuk je i kënaqur me veten tënde… Prit, mos u dëshpëro, mos e humb fillin, as shpresën!
Ulu në një vend të qetë, larg zhurmës së serialeve, muzikës së rrugëve, britmave që shurdhojnë pallatet, vërshëllimat hutaqe e zhurmat e sinjaleve që lëshojnë programet e ndryshme në aparatin tënd celular… Largohu për pak nga të gjithë!
I pastër, i parfumosur, ulu në qetësi, mbylli sytë, veçohu nga bota dhe, në pamundësi për të udhëtuar drejt vendeve tua të shenjta, nis tavafet e dashnisë shoqëruar me emrat e bukur të Zotit tënd…
Përsërit me zemër, teksa kontrollon frymëmarrjen tënde: All-llah, All-llah, All-llah.., dhe shijo madhështinë e lidhjes më të mrekullueshme në univers..!
(Pas kësaj, nuk ka më nevojë për fjalë…)
Imam Muhamed B. Sytari
Shkodër, 15 shtator 2020