Rruga drejt xhamisë së Kubasë dhe Malit Uhud, shoqërohet përherë me kujtesën historike, që lidhet me këto dy vende, si dhe me ndjesinë e fortë të pjesëmarrjes në vizitat e tyre, si pjesëtar i UMMETIT ISLAM… Si të thuash, falënderimi i qoftë All-llahut, i Cili na udhëzoi në Islam dhe na bëri prej muslimanëve!
Xhamia e Kubasë, e cila përmendet edhe në Kur’an, është e para faltore në Islam. Vetë Resulull-llahu (a.s) mori pjesë në ndërtimin e saj, para se të hynte në Medine, ditën e Hixhretit… Ajo është xhamia, që në Kur’an është përjetësuar si: “Xhami e ndërtuar me përkushtim”, ku Hz. Muhammedi (a.s) udhëzohet të falet në të, së bashku me “burrat, që dëshirojnë të pastrohen”…
Kubaja mbeti përherë pikëreferimi në jetën e Resulull-llahut (a.s), edhe pas mbërritjes në Medine, edhe pas kthimit nga Meka, deri në largimin e tij nga kjo botë… “Kush del me abdes nga shtëpia e tij dhe vjen në Kuba, ku fal dy rekate, do të ketë shpërblimin e një Umreje”, thoshte Zotëria i bijve të Ademit, teksa nxiste ymmetin e tij për të mos ia kthyer shpinën kësaj xhamie me histori e kredo hyjnore…
Ndërkohë, në Uhud, çdo atom përbërës i asaj zone të begatë mbart në vetvete dashni dhe mall, nga i njëjti që shekuj më parë mbarte në zemrën e tij Uhudi… Po, po, mali Uhud ishte përmaluar aq shumë, sa një ditë, teksa Resulull-llahu (a.s) po kalonte mbi të, së bashku me Hz. Ebu Bekrin, Hz. Omerin dhe Hz. Osmanin, ai nisi të dridhej… “Qetësohu, o Uhud se, mbi ty po qëndron një i dërguar, një siddik dhe dy shehidë!”, i pat thënë Resulull-llahu (a.s)…
E, kush nuk e ka dëgjuar se: “Uhudi është një mal, që e duam dhe na do!”, fjalën e bukur dhe plot meditim, me të cilën Hz. Muhammedi (a.s) i prezantonte Uhudin, sahabëve të tij dhe krejt ymmetit, deri në kiamet…
Ndoshta këtu qëndron edhe sekreti i këtij mali, bukuria dhe prezenca e të cilit, të tërheqin nga larg dhe të bëjnë ta duash dhe ta ndjesh, si të mos ishte ngurtësirë… I miri Uhud…
Gjatë gjithë kohës që udhëheqësi i grupit po tregonte detaje nga beteja e famshme e Uhudit, teksa hidhja sytë përreth, më dukej se edhe vetë mali mbante vesh dhe sikur rinohej e gjallërohej me përmendjen e Resulull-llahut (a.s) dhe sahabëve të tij, që shkruan histori lavdie, dashurie e krenarie islame me shpirtin dhe gjakun e tyre, në këtë vend, bri këtij mali, që vazhdon të marrë e të japë dashni e mall për Ma të Dashtunin…
Përherë, vizita e Kubasë dhe Uhudit, mbeten kryefjalë e përkushtimit dhe dashnisë, në raportet e muslimanit me fenë e tij. Si të thuash, secili prej nesh, do të duhej ta lexonte mirë historinë dhe shpirtin e ndërtimit të xhamisë së Kubasë, njësoj si mësimet dhe konkluzionet e betejës së Uhudit, ku Resulull-llahu (a.s), desh humbi jetën…
Imam Muhamed B. Sytari
Medine Munevvere, më 18 shtator 2016